Read in the reader, with word lookup

Գանձեր, տաղեր, փոխեր · 1/1

[ՃԳ]

Ներգործական զաւրութիւն, անեղ բնութիւն ի վեր քան զբան,

Անսկիզբն եւ սկսեալ եւ բղխումն անընդհատ,

Անծին եւ ծնեալ եւ ելումն ի յԷէն,

Է եւ էակ եւ էակից նոյնութիւն,

Լոյս եւ ծագումն եւ աղբիւր բարութեան,

Անքնին եւ անճառ, եւ քննիչ իսկութեան,

Նախագաղափար եւ պատկեր, եւ տիպ անորակ,

Աստուածութիւն անուանելի, եւ անուն բնութեան անհետազաւտելի,

Անպատճառ էութիւն, եւ պատճառ գոյից անտարրից եւ տարրեղինաց,

Ստեղծող եւ խնամող.

Ահա ընկալցիս զայս երգ աւրհնութեան ի նուէր փայլման քո լուսոյ

Ընդ հոգեղինացն ի հողեղինացս, աղաչեմք:

Երրորդութիւն ծայրագոյն, անորիշ բաժանումն եւ անանջրպետ միութիւն,

Պարզ անզնին եւ թիւ կատարեալ,

Ի մի պատճառ է երկեակ շարժութիւն կնքեալ ի յերիս,

Իսկապէս երկուց ծայրից անհասից ունակ մշտնջենաւորութիւն,

Վերին խորոց եւ ստորնայնոցս շարժումն եւ կայումն,

Եւ մշտաշարժ բնութեանց շարժող յանշարժից,

Անքանակ, աներբ, անուր, անկէտ եւ անժամանակ,

Որ ի վախճան գոյացութեան աննիւթից եւ նիւթականաց

Ստեղծեր խորհրդեամբ մի եւ նոյն կրկին կենդանի

Ի տիպ տիրականդ քո պատկերի.

Անտեսիդ տեսիլ եւ անձեւիդ կերպարան

Լուսով պարագրեալ եւ անմահական վայրի վիճակեալ,

Որ հպմամբ անհպելի տնկոյն մերկացաւ զփառս անեղիդ.

Ահա ընկալցիս զայս երգ աւրհնութեան ի նուէր փալյման քո լուսոյ

Ընդ հոգեղինացն ի հողեղինացս, աղաչեմք:

Րաբունաբար մինդ ի յերից, իմաստութիւն Հաւր եւ բան,

Խոնարհեալ ի ստորինս, յորմէ յաւէտ աննուազ,

Գոլով անթերի ի ծոց հայրենի,

Քոյինաստեղծ պատկերին ի խնդիր նորոգման,

Գտեալ ի բնակ մաքուր կուսութեան հոգւոյդ տաճարի,

Միացար ընդ նոյն խառնութեամբ անյեղապէս եւ անբաժանելի.

Եւ զի ոչ բերիւր յեղելութեան բնութիւնս

Զանեղիդ անպարունակ տեսութիւն լուսոյ,

Ծածկեցեր զլոյսդ անվայրափակ իբրեւ վարագուրաւ ընդ մարմնոյ

Շրջեալ ընդ մարդկան մարդկապէս, Աստուած բոլորից.

Ահա ընկալցիս զայս երգ աւրհնութեան ի նուէր փայլման քո լուսոյ

Ընդ հոգեղինացն ի հողեղինացս, աղաչեմք:

Սէր, անուն պանծալի եւ գերազարդ քոյին կոչմանցդ ամենի,

Որով իւղ թափեալ փեսայդ երկնաւոր,

Հեղեալ ի գութ խանդակաթ հարսին ըղձաւոր,

Զպարածածկեալն լոյս արփիաւոր

Արտափայլեալ ցուցեր այսաւր ի Թաբաւր,

Ի տեսիլ հրաշից փեսաւէրաց առաքելոց եւ մարգարէից.

Ի վկայութիւն երկուցն եւ երից, հնոցն եւ նորոցս,

Տէր զքեզ ծանուցեալ կենդանեաց եւ մեռելոց,

Կոչմամբ Մովսեսի եւ Եղիայի,

Որք խաւսէին զելից քոց յԵրուսաղէմ.

Ի փրկագործ կրիցն ադամեանց լրումն

Յայտնեցար վիմին հաւատոյ,

Ոչ մի ի գոյիցս, այլ Տէր համայնից,

Յորմէ պակուցեալ զերից տաղաւարացն ազդէր զխորհուրդ:

Ահա ընկալցիս զայս երգ աւրհնութեան ի նուէր փայլման քո լուսոյ

Ընդ հոգեղինացն ի հողեղինացս, աղաչեմք:

Էն անեղ իր եւ անուն մշտնջենաւոր,

Անտես տիրապէս յէից եւ եղելոց հայր,

Անձեռագործ տաղաւարաւ ամպով Հոգւոյն երեւեալ ի բարձանց`

Դաւանէր զքեզ որդի ըստ բնութեան,

Եւ սիրելի համակամութեամբ ընտրեալ ըստ մերումս

Եւ հաճեալ ըստ տնտեսութեան.

Ոչ ոմն եւ ոմն, այլ մի եւ նոյն առեալն եւ առողդ.

Ի հրաշիցն հնչմանց վիմին սասանեալ եւ որոտմանցն թմբրեալ,

Յանուշից անմահական բուրմանցն զմայլեալք,

Եւ ի տիպ տեսլեան արքայութեան աւուր ցնծացեալք,

Նախահարցն դիտմամբ բերկրեալք

Եւ ապագայիցն յուսով զուրաճացեալք.

Ահա ընկալցիս զայս երգ աւրհնութեան ի նուէր փայլման քո լուսոյ

Ընդ հոգեղինացն ի հողեղինացս, աղաչեմք:

Սոսկալի աւուրս շնորհիւ եւ խորհրդոյս զաւրութեամբ

Համբարձցես զմեզ ընդ լերինսն ընտրութեան,

Ի կոյս լերանցն յաւիտենականաց,

Ի լեառն Աստուծոյ իմաստութեան,

Ի լեառն պարարտ աւծութեան,

Ի լեառն մածեալ ընդ քեզ միութեան

Եւ հաճոյ ի սպառ քեզ ի բնակութեան:

Ցաւղեա' ի Հերմոնէդ վերնում զցաւղ քաղցրութեան

Ի լերին դստեր Սիոնի,

Հաշտեա' ընդ մանկունս սորա, սարտուցեալս ի քոց բարութեանց,

Ընդգրկեա' զվարատեալքս ի գիրկ հայրենիդ գրգանաց,

Ժողովեա' զցրուեալքս եւ մխիթարեա' զսգացեալքս,

Հաստատեա' ի վէմդ ամրութեան զտառապեալքս եւ զխախտեալքս,

Հերքեա' ի քոց ծառայից զծառայեալսն մեղաց

Եւ ազատեա' զազատեալքս արեամբ քո սրբով:

Ահա ընկալցիս զայս երգ աւրհնութեան ի նուէր փայլման քո լուսոյ

Ընդ հոգեղինացն ի հողեղինացս, աղաչեմք:

Ի բարձունս ամբառնամք զձեռս եւ զմիտս առ մերձդ ամենից.

Հասցե'ս ի մէջ յանուն քո ժողովելոցս ողորմութեամբ որպէս էութեամբ,

Ընկա'լ զաղերս աղաւթից մերոց յաւուր մեծի ծագման քո լուսոյ,

Բարձրացո' զեղջիւր եկեղեցւոյ քում սրբոյ,

Փարատե'ա զկրկին խաւար մեղաց եւ նեղչաց,

Լուսաւորեա լուսով իմաստութեան եւ խաղաղութեան,

Պահեա' ի սմա անստուեր եւ զառ ի քէն զլոյս իմաստից բաշխողս`

Զհայրապետն մեր` զտէր [այս անուն]

Զնախաթոռ հովուաց քոց բանաւոր հաւտի,

Եպիսկոպոսաւք, քահանայիւք եւ վարդապետաւք,

Սարկաւագաւք, դպրաւք եւ համաւրէն պաշտաւնէիւք,

Զաւրացո' զթագաւորն մեր [այս անուն]

Բարեպաշտութեամբ հերքել զհոյլս ամբարշտութեան,

Զիշխանս` իշխել հակառակացն ճշմարտութեան,

Զաւրականացն տո'ւր քաջութիւն եւ ախոյանիցն` յաղթութիւն,

Աշխարհայնոցն` ամրութիւն, շինութիւն եւ խաղաղութիւն,

Առատութիւն պտղոց առաւրէիս եւ յաւիտենականին.

Ահա յիշեսցես ողորմութեամբ եւ զհոգիս հանգուցելոց մերոց`

Հաւատով ի քեզ ննջեցելոց, խնդրեմք:

Եւ եւս առաւել

Զյորդորումն սիրոյ եւ զգործս բարեաց պարգեւել մեզ, խնդրեմք:

Րոտել զմեզ ի մի լրութիւն կաթողիկէ,

Յաւդեալ ի գլուխ եկեղեցւոյ, խնդրեմք:

ՓՈԽ

Գերագոյն լուսոյդ անեղի

Զեղականաց լուսոյ մաղթանս ածեմք առաջի.

Զհրեղինացն նախ հոսելոց եւ հուպ եղելոց,

Զհողեղինաց սեռից ի քէն լուսաւորելոց,

Զանվայրափակ լուսոյդ ունողի

ԶՄարբամու Աստուածածնի եւ միշտ կուսի,

ԶՅովհաննու կարապետի ի ծնունդս կանանց մեծի եւ քում մկրտչի,

Զառաքելոց եւ զմարգարէից,

Եւս եւ զարփիական լուսոյդ տեսլեան այժմ արժանաւորաց,

Զպսականուն նախկի վկային,

Եւ զնովաւ արեամբ մկրտելոց ընդ քեզ կամաւոր զենմանց,

Զբազմանուէր պատարագի Լուսաւորչին մերոյ սրբոյն Գրիգորի

Եւ զհամաւրէն զքեզ սիրողաց ճգնաւորաց դասուց,

Որոց հայցմամբ պահեսցես զժողովեալքս

Ի կրից բոլորից փորձանաց`

Ուղղել զմիտս բնաւից ի շաւիղս արքայութեանդ երկնից,

Եւ ի ծագման քո հայրենի փառաւք յաւուրն մեծի,

Զորոյ ցուցեր այսաւր զտիպ լուսոյ աղաւտ եւ չափաւորապէս:

Եւ այժմ ողորմեա'ց մեզ, Տէր Աստուած մեր,

Ըստ մեծի ողորմութեան քում:

[ՃԴ]

Նորահրաշ տաւնիւս կուսական

Արփիականացն համաձայնելով դասուց`

Երաժշտական նուէր ներբողից երրակի անձանց միութեան

Երեքսրբեան հնչմամբ նուագեմք.

Որոյ բնաւ բնութիւն ծայրագոյն էականացս սեռից.

Էն յէութեան անեղապէս,

Որդւոյ պատճառ իր եւ անուն հայրական.

Բան եւ ծագումն անսկզբնաբար

Յէն միշտ էակ ի վեր քան զբան.

Հոգի հայրաշարժ բղխեալ ի Հաւրէ,

Որդւոյ փառակից եւ Տէր բոլորից:

Ահա ընկալցիս զայս նոր աւրհնութիւն ի նուէրս աղաւթից

Հայցմամբ ծնողի Բանիդ եւ մարմնարանի, աղաչեմք:

Երրաբուն Էին համայնոյ անտեղի եւ լոյս գերարփի,

Անեղ յէութեան բնութիւն անթերի,

Անկէտ կատարումն եւ պարզ գերազանց,

Անորիշ գոյութիւն, անանջրպետ միութիւն,

Երեքանձնեան իսկութիւն եւ միաստուածութիւն,

Յորմէ միայնոյ ստեղծեալ եղեալքս ամենայն.

Հրեշտակական հոյլք երամից աւրհնաբանիչ անմահ կենդանիք.

Ստորին զգալի քառիւք դիմակաւք զարմանազան աշխարհ կենդանեաց.

Ի հակառակաց միացուցեալ ոգւոյ եւ մարմնոյ զԱդամն առաջին

Գեղապաճոյճ փառաւք զարդարեալ կողածնաւն ի դրախտն Ադենայ.

Որոց զտիրականն աւրէն մոռացեալ դատապարտին մահու,

Որովք ոչ եղեալք ի քէն անտես բարերար.

Ահա ընկալցիս զայս նոր աւրհնութիւն ի նուէրս աղաւթից

Հայցմամբ ծնողի Բանիդ եւ մարմնարանի, աղաչեմք:

Րամեալ միայնոյ երրակին լուսոյ,

Հայրական բարբառոյ ձայնեալ վերստին Բանին եւ Հոգւոյ

Առնել ոչ ի պատկեր իւր մարդ որպէս ի սկզբանն,

Այլ ծոցածին փառացն լուսոյ

Զհողանիւթեայ տիպ նախնոյն զգենուլ ծառայի.

Ուստի ընտրեալ ի բիւրուց Գաբրիէլ պետ անմարմին զուարթնոցն,

Տէրունեան խորին խորհրդոյ առ նոյն ազդեալ ի վերուստ`

Փոյթընթաց արագ սլացմամբ ճեպեա յաշխարհն մահու,

Բարբառ աւետեաց հնչեա բերկրութեան տրտմեցելոյ դստերն Եւայի,

Հրաւիրեա լինել տաճար սրբութեան Բանիս գալստեան,

Որով յառաջեալ անքայլ գնացիւք առ կոյսն Մարիամ`

Ձայն առ նա ցնծալի եւ լուր քաղցրութեան հնչեցեալ.

_ Ուրա'խ լեր, բերկրեալ, տրտմութեան բարձող նախամաւրն,

Տէր ընդ քեզ յաւիտեան, եւ Սուրբ Հոգին հովանաւորեալ,

Զի ծնեալն ի քէն է Հաւր միածին եւ անդրանիկ, փրկիչ աշխարհի.

Ահա ընկալցիս զայս նոր աւրհնութիւն ի նուէրս աղաւթից

Հայցմամբ ծնողի Բանիդ եւ մարմնարանի, աղաչեմք:

Սոսկալի դիտմամբ պակուցեալ վեհին անմարմնոց,

Զառաքողիդ նախաշաւիղ յորովայնի Կուսին տեսեալ զգալուստ,

Յորում ներգործեալ անսերմ յղութիւն`

Լուծեր տիրաբար զաւրէնս քո եդեալ.

Ծնեալ կուսութեամբ ի վեր քան զբան,

Անմայր ի յերկինս, անհայր ի յերկրի,

Կուսական կաթամբ կերակրեալ, լցողդ ամենից,

Բարձեալ ի գիրկս, բարձողդ բնաւից,

Աճեալ ըստ մարմնոյ, աճման պատճառ բոլորից,

Շրջեալ ընդ մարդկան, ստեղծողդ Ադամայ,

Վերառեալ զցաւս ոգւոց եւ մարմնոց.

Եկեալ կամաւ ի չարչարանս խաչի եւ մահու,

Անմահդ մահուամբ, զմահ մեռուցեր, զմեզ կեցուցեր.

Երեքաւրեայ յարուցեալ համբարձար առ Հայր ի յերկինս.

Խոստացար Կուսին տիրուհւոյ ի տիպ համայնիցս

Գալ վերստին, առնուլ առ քեզ յանճառ բնակութիւնդ.

Ահա ընկալցիս զայս նոր աւրհնութիւն ի նուէրս աղաւթից

Հայցմամբ ծնողի Բանիդ եւ մարմնարանի, աղաչեմք:

Երեւեալ երբեմն հրեշտակապետին ի լրումն խոստացելոցն,

Բերեալ բրաբիոն Կուսին նշան յաղթութեան կրից աշխարհի,

Զուրախութեան առ նոյն վերստին հնչեալ զաւետիս.

_Նախկին աւետեաց ընկալ, _ ասէ, _ այսաւր կատարումն,

Վերաբերեալ ի ստորնայնոցս յիմանալեացն խորանս

Հուպ յանմատոյց լոյս Երրորդութեան

Փառաց ի փառս փոփոխելով.

Որով զուարճացեալ, նուէր գոհութեան ընդ մեծի շնորհի

Քեզ ընծայելով հայցմամբ մաղթանաց,

Համասեռիցս վասն պաղատէր

Փրկութիւն խնդրելով ի քէն, մարդասէր.

Ահա ընկալցիս զայս նոր աւրհնութիւն ի նուէրս աղաւթից

Հայցմամբ ծնողի Բանիդ եւ մարմնարանի, աղաչեմք:

Սաւառնաթեւիցն առաքելոցն համանմանեալ դասուց,

Լուսափայլ ամպովք ի վերնատունն խորհրդոյ

Բերեալ հրաշիւք ի Հոգւոյն,

Ի գոյժ հրաժարման տիրուհւոյն թախծեալ,

Զնոյն յուսապատար բանիւ սփոփեալ.

Վեհիդ ի վերուստ ծագման լուսոյ ակնարկեալ,

Տեսլեամբ փառաց քոց հրեղինաց դասուք ցնծացեալ,

Յաւանդումն ամենասրբուհւոյն ոգւոյ սխրացեալ.

Զմարմինն մաքուր ամփոփեալ,

Կուսանաց խմբիւք պար առեալ,

Հրեշտակացն աւրհներգութեամբ ձայնակցեալ,

Ի գերեզման մահու ընդ մահացելոցս իջուցեալ,

Եռաւրեայ ըստ միածնիդ իւրում յարուցեալ,

Անմարմնական զաւրաւք յերկինս վերացեալ,

Յանմերձենալի լոյս աստուածութեանդ մերձեալ

Բարեխաւս միշտ առ քեզ վասն մեր.

Ահա ընկալցիս զայս նոր աւրհնութիւն ի նուէրս աղաւթից

Հայցմամբ ծնողի Բանիդ եւ մարմնարանի, աղաչեմք:

Ի քեզ վեր համբառնամք զձայն պաղատանաց,

Աստուածածին, միշտ կոյս Մարիամ,

Դրախտ աստուածատունկ եւ Եդեմ վայելուչ

Կենսատու տապան նոյեան եւ աստուածընկալ խորան աբրահամեան,

Մորենի անկէզ եւ վէմ աղբիւրահոս,

Աշտանակ լուսոյ եւ տապանակ կտակի,

Սափոր ոսկի եւ բուրուառ խնկոց,

Գեղմն ցաւղահոս եւ լեառն վիմածին,

Ակն շափիւղայ եւ մարգարիտ պատուական,

Քաղաք Աստուծոյ եւ տաճար հոգեւոր,

Պարտէզ փակեալ եւ աղբիւր կնքեալ,

Բլուր կնդրկի եւ հովիտ շուշանի,

Նորդոս բուրեալ եւ քրքում ծաղկեալ,

Անապատ անկոխ եւ երկիր բանաւոր,

Ամպ թեթեւ եւ աթոռ քառակերպեան,

Դուռն աղխեալ եւ տումար անլուծանելի,

Առաւաւտ արփւոյ եւ արեւելք արեւու,

Ապաւէն կենաց կենդանեաց

Եւ յոյս յապագային աւուրն ննջեցելոց.

Ահա յիշեսցես առաջի միածնի Որդւոյ քո

Զհոգիս հանգուցելոց մերոց, մայր Աստուծոյ, աղաչեմք:

Եւ եւս առաւել

Զյորդորումն սիրոյ եւ զգործս բարեաց պարգեւել մեզ, խնդրեմք:

Րոտել զանձինս մեր ի մի միաբանութիւն

Հաւատոյ, յուսոյ եւ սիրոյ, խնդրեմք:

ՓՈԽ

Գանձ պատուական կաթողիկէ եկեղեցւոյ յայտնեալ, սուրբ Աստուածածին,

Որով ճոխացան հարսունք երկնաւորք եւ աւրիորդք ըղձաւորք,

Զորոց գումարեալ ընդ քեզ

Զխումբս ընտրութեան հայցեմք ընդ մեր մաղթանաց,

Զդասապետս դասուք իննուց վեհից հուպ քեզ այժմ եղելոց.

Զձայնն Բանին եւ զպսակն պսակողին`

Առաքելովք եւ մարգարէիւք,

Մարտիրոսաւք եւ որ մերն է` լուսոյ ծագողաւ,

Մաքուր կուսանաւք, ճգնաւորաւք եւ համաւրէն ընտրելովք`

Պահել պահողին էին զամենեսեան յապահովս`

Զվերակացու եւ զնախընթաց հոգւոց մերոց

Զհայրապետն մեր` զտէր [այս անուն],

Եպիսկոպոսաւք եւ վարդապետաւք,

Քահանայիւք եւ պաշտաւնէիւք,

Վանականաւք եւ աշխարհայնովք.

Զթագաւորն մեր [այս անուն]` հնազանդելովք,

Եւ զիշխանս` իշխեցելովք,

Զզաւրավարս` զաւրականաւք, եւ զժողովս` ժողովրդովք,

Եւ ամենայն հաւատացելոց

Շնորհել ողորմութիւն յայժմուս եւ յաներեկ աւուրն:

Եւ այժմ ողորմեա'ց մեզ, Տէր Աստուած մեր,

Ըստ մեծի ողորմութեան քում:

[ՃԵ]

Աստուած անեղ եւ անժամանակ,

Անսկիզբն, անեզր եւ անկատարած,

Լոյս անմատոյց, գերարփի անուր, անուստ եւ տիպ անսահման,

Գերագոյն բնութիւն էութիւն, ի վեր քան զմիտս եւ զբան,

Երիս անձնացեալ դիմաւք եւ ի մի բնութիւն,

Տէրութեամբ եւ արարչութեամբ հաւաքեալ,

Անքակ ժողովումն, եւ միութիւն բաժանեալ կերպիւ եւ անուամբ,

Անսկիզբն եւ սկսեալ, եւ ելումն ի Հաւրէ,

Անծին եւ ծնեալ, եւ բղխումն ի յԷէն,

Իսկութիւն անպատճառ եւ պատճառ ծագումն,

Եւ ելումն անշփոթ միութիւն,

Զուգակիցք հաւասար զաւրութեամբ, էութեամբ, փառակցութեամբ,

Եւ որոշեալք յատկութեամբ,

Արարիչ ամենից բնաւից բոլորից,

Կատարիչ անվրէպ հրամանաւ յանէից,

Ստեղծիչ կրկին բնութեանց կենդանեաց աննիւթից եւ նիւթականաց,

Աղբիւր բարութեան, Տէր տարրականաց, եւ անտարրից պատճառ,

Եւ պետ բոլորից, սուրբ Երրորդութիւն.

Ընկա'լ, մարդասէր, բարերար կամաւք զնուէր մաղթանաց երկրածին մարդկան`

Յաւր յիշատակի երկնային անմարմին զուարթնոցն, աղաչեմք:

Ներգործական զաւրութեամբ շարժեալ անշարժիդ յեղումն եղելոցս,

Հաճեցար յինքնաբուղխ հոսեալ բարեացդ

Անհատ նման ստեղծանել քեզ բարիս.

Հրաշից արարչիդ առնել տեսողս

Կամեցար անտեսիդ փառաց վայելման.

Կրկին գեղեցկապէս ստեղծեր երկին մարմին,

Եւ անմարմին լցեալ անթիւ բնակչաւք զարդարեցեր.

Յանեղէդ եղեալք երկրորդ արարչիդ մեծիդ Աստուծոյ,

Աթոռք հանգստեան անկարաւտիդ բազմելոյ

Յանծայր իմաստիցդ առեալ լցմամբ գիտութեան.

Բազմաչեայ գունդ քերովբէից մերձ աստուածութեանդ,

Սրբասաց սերովբէք, յորմէ գոյացան հուպ եղեալք

Պակուցմամբ առ նոյնդ կայանիւ.

Տիրապէս տէրութիւնք, զաւրութիւնք, իշխանութիւնք

Յիշխանաբար իշխողէդ ստեղծան.

Միջինք երկնայնոցն պետութիւնք, հրեշտակապետք եւ հրեշտակք,

Անհիւթիցդ ծայր եւ կնիք` ի քէն գոյացան.

Իննեակ դասուցդ անմահիցդ

Կարգեցեր երիս քահանայապետութիւնս.

Կատարիչ, լուսաւորիչ, մաքրիչ առողս եւ բաշխողս,

Զգիտութիւն ծորես միջոցաւ, զլոյս` նախնեաւքն առ վերջինս.

Շնորհեցեր սահման յետնոցն յառաջինս դառնալ

Նմանիւ ըստ կարութեան.

Եւ զբնաւքն ի քեզ սիրով միութեամբ արքայիդ անմահի

Կարգեցեր հազարք հազարաց եւ բիւրք բիւրուց,

Առ դուրս հզաւրիդ միշտ արթուն զինուորս ահաւորք.

Ընկա'լ, մարդասէր, բարերար կամաւք զնուէր մաղթանաց երկրածին մարդկան`

Յաւր յիշատակի երկնային անմարմին զուարթնոցն, աղաչեմք:

Մեծահրաշ բերկրանաւք ի սէր յարապէս ցնծան

Արարչիդ հոյլք հոգեղինացն անլոյծ խնդութեամբ.

Վերակնեալք անտես տեսլեամբ տռփիւ բաղձանաւք,

Իբր ի սկիզբն ի քեզ, ի պատճառ մասանց բոլորից.

Ստեղծողիդ պարգեւաց սպասեալ հոսման իմաստից վտակաց,

Զնոսին արբուցող որպէս զբուրաստան գետոյ վայելուչ,

Յորմէ լցեալք անյագութեամբ, եւ միշտ ի նոյն ծարաւեալք,

Որպէս շուշան ի ցաւղ գարնայնոյ.

Զառեցեալն ի քէն ծորմամբ գիտութեան

Անխանտաբար բաշխեն յետնոցն առաջինքն ի քէն

Բարեդրեալ հրամանաւ,

Ըստ հասման ինքնութեանց բերեալք զանհասիդ

Յինքեանս աւրինակ անկերպ կերպարանեալ նմանիւ.

Ընկա'լ, մարդասէր, բարերար կամաւք զնուէր մաղթանաց երկրածին մարդկան`

Յաւր յիշատակի երկնային անմարմին զուարթնոցն, աղաչեմք:

Առաքեալք ի քէն անյայտ խորհրդեամբ`

Զփրկութիւն ի պաշտաւն ժառանգողաց մարդկան ազգի

Պահապանք միջնորդք քաղցրութեան սաստից եւ սպառնման.

Եւ զքեզ ուսուցիչք սիրով ադամեանցս.

Սրովբէն հրանիւթ զկենացն տունկ պահէր,

Զի մի' պատրեալն Ադամ կերեալ մշտասցի մահուամբն անյաջորդ.

Ի դիմաց արարչիդ հարցողք զՀաբելի մահուն

Ընդ սպանողն առաջին եղբայրն Կայէն.

Ենովքայ յերկրէս մահու յաշխարհն ածիչք կենդանեաց,

Աբրահամեան խորանին բնակողք եւ կերողք որթոյն,

Եւ տուիչք աւետեաց որդիս ունելոյ.

Ղովտաց յերկրէն հանողք Սոդոմայ,

Եւ զնոյն պատժողք ցաւղաբեր հրով յերկնից տեղացեալ.

Ի հայրազէն մահուանէն զերծողք պատանւոյն Սահակայ

Եւ զխոյն փոխանակ պատրաստողք.

Յակոբայ սանդղոյն ելողք

Եւ իջիչք յերկնից յաշխարհ առ մարդիկ.

Յեգիպտուհւոյն փրկողք Յովսեփայ,

Եւ զանուրջսն նովաւ հանեալ ի բանտէն յայտնիչք արքային.

Ընկա'լ, մարդասէր, բարերար կամաւք զնուէր մաղթանաց երկրածին մարդկան`

Յաւր յիշատակի երկնային անմարմին զուարթնոցն, աղաչեմք:

Հրաշալի տեսլեամբ երեւեալք Մովսեսի

Ի վեր քան զկարծիս ի մորենւոջն անկէզ բորբոքմամբ.

Ցեղին Սահակայ զսոյն փրկիչ

Առաքէր զուարթունն ի դիմաց մեծիդ Աստուծոյ

Անդրանկացն Եգիպտոսի սատակիչք

Եւ հանիչք ժողովրդեանն յանապատ.

Ընդ ծովն անցեալ խորագոյն, ուր զփարաւոն հեղձեալ զաւրութեամբ:

Ահարոնեան ուսուցիչք քահանայութեանցն

Հոսեալ զաւրինակ յինքեանս եղելոյ.

Առաջնորդք Յեսուայ յերկիրն աւետեաց

Ի տիպն երկնից գաւառացդ,

Որոց Միքայէլ իշխան ըստ Մովսեսի բաժանմանցն,

Ըստ ազանցն թուելոց

Սպառնման արքային դաւթի հրեղէն սուսերաւ,

Ի սաստ բարկութեան առաքեալ ի քէն զուարթունն.

Իմաստնոյն հանճարոյ նպաստ նոքա

Եւ սատար ի գլուխ աւծեալ բանակին եւ շինման տաճարին.

Կառք քառակերպեան Եզեկիելի երեւեալք,

Յորոյ վերայ բազմեալ Աստուածդ աստուծոց.

Պատժողք արանց հեստելոց եւ դրիչք նշան ի ճակատ արդարոցն

Հրանիւթ անուաւք զՀեղիաս յաշխարհն ամբարձին կենդանեաց,

Եւ բիւրք բանակէին շուրջ զԵղիսէիւ.

Եսայեայ ունելեաւք բերեալ սրովբէն կայծակն

Ի շրթունս մաքրիչ պղծութեանց համաւրէն դասուց տեսողացն.

Երկնայինքդ` ուսուցիչք նոցա եւ զեղեալսն ճառողք.

Ընկա'լ, մարդասէր, բարերար կամաւք զնուէր մաղթանաց երկրածին մարդկան`

Յաւր յիշատակի երկնային անմարմին զուարթնոցն, աղաչեմք:

Ի սկզբան անեղիդ եղելութեան մարմնով անճառ Հաւր,

Ծննդեամբ Որդւոյդ եւ Բանիդ սոքա եղեն սպասաւորք.

Պետն հրեղինաց Գաբրիէլ բերեալ աւետիս Մարիամու`

Ծնանիլ կուսութեամբ զՏէրդ եւ զծնեալդ աներբ ի Հաւրէ:

Զաքարիայ սոյն գոչէր զուարթունն`

Ծնանիլ Մկրտիչ ի ծեր յարգանդէ,

Եւ զնոյն պատժեաց պապանձմամբ.

Ի ծննդեանն աւետաբերք բացաւթեայ հովուացն

Եւ երգիչք փառացդ Աստուծոյ.

ՅԵգիպտոս երեւեալ զմանուկդ հինաւուրց

Զուարթուն Յովսեփայ տանել դեռածին

Եւ նոյն տեսլեամբ դառնալ անդուստ ի Սաղիմ.

Քեզ` անկարաւտիդ յանապատն յաղթութեան

Հոսեալ թափեցան ի սպաս սեղանոյ,

Եւ բերողք հացի արարչիդ եւ կերակրողի զարարածս,

Ի սաստկագոյն պակուցման երկիւղէ մահուն

Փրկագործ զաւրացուցիչք լինէին զաւրացուցչիդ երկնաւորաց եւ երկրաւորաց.

Գերեզմանի անմահիդ պահապանք,

Եւ կանանցն իւղաբերից քարոզք յարութեան զմարդիկ յառնողիդ.

Վերացման մարմնով հզաւրիդ համբարձիչք,

Եւ կառք քառակերպեան ըստ մարգարէին

Ածողք յերկինս ի ծոցն Աստուծոյ.

Ընկա'լ, մարդասէր, բարերար կամաւք զնուէր մաղթանաց երկրածին մարդկան

Յաւր յիշատակի երկնային անմարմին զուարթնոցն, աղաչեմք:

Ցնծութեամբ տաւնեմք զյիշատակ լերանցդ անմահից,

Զմերձիցն առ քեզ, Աստուած բոլորից հրաշից,

Առ մեզ նոքաւք ներգործիչ.

Զընտրեալ դասուն մետասան զպետն եւ զգլուխն

Հաներ նոքաւք ի բանտէ սքանչմամբ մահու կապանաց.

Զանաւթն ընտրութեան յերրորդ

Համբարձեր յերկին հրեշտակաւք

Եւ ուսուցեր նմա զբանս անճառ անպատումս.

ՑՓիլիպոս խաւսեալ հրեշտակին ի կառս յարեալ ներքինւոյն

Եւ վերածնեալ զնոյն յորդիս Աստուծոյ.

Կուռնելիոսի երեւեալ զուարթունն աղաւթից նորա,

Եւ ողորմութեան ածիչն առաջի քո, Յիսուս մարդասէր.

Սրբուհւոյ Կուսին` մարմնով զքեզ ծնողին

Բերեալ նշան յաղթութեան աշխարհի

Եւ հրաւէր փոխման բրաբիոն ոստս արմաւենւոյ.

Դու բազմութեամբ իջեալ զաւրաւք հրեշտակաց

Ի փոխումն Իսկուհւոյն,

Աստուած սրովբէից Յիսուս եւ Տէր քրովբէից.

Յիշխանն անմահից Միքայէլ

Զաւանդեալն ետուր զհոգի Կուսին

Համբառնալ ի լուսաճեմ խորանս անմատոյցս.

Մաւր քո մարմնոյ տապանին

Կացուցեր զհոյլս անմահից պարողս,

Յերգս հոգեւորս, որովք փոխեալ յերկիր կենդանեաց,

Նաեւ վկայիցն, եւ հայրապետացն, եւ ճգնաւորացն

Աւգնականս, սպասաւորս, եւ զաւրացուցիչս.

Ընկա'լ, մարդասէր, բարերար կամաւք զնուէր մաղթանաց երկրածին մարդկան`

Յաւր յիշատակի երկնային անմարմին զուարթնոցն, աղաչեմք:

Քե'զ, հզաւր, մարդասէր եւ բարերար,

Մաղթեմք արտասուաւք` առաջի անկեալ արարչիդ.

Զյիշատակ տաւնի մեծին Միքայելի ի հաճոյս քեզ ընկալ, բարեգութ,

Որով զմարդիկ պահպանես եւ պատժես

Ըստ հատուցման արժանեաց չարացն եւ բարեացն,

Որպէս յանապատն զզաւրս անաւրէն արքային մեղսասէր

Տապաստ արկեր զուարթնովս.

Զզաւրսն հագարացւոց յաւուր տաւնի իւրոյ

Ի քաղաքն Ակլոնայ զարհուրեցոյց զաւրեղ քաջութեամբ,

Հրաշապէս անհետեալ խորտակեաց

Զծովարշաւ հեծեալսն անաւրէն զաւրացն

Յայտնապէս զինուորս Միքայէլ անյաղթ քաջութեամբ.

Ի սոյն քաղաք զանաստուած բանակն աւտարաց

Սովով եւ սրով սատակէր

Սոյն զինուոր երկնից արքայիդ, որպէս ի հնումն:

Եւ եւս առաւել

Գեղարդեամբն հերձեալ պատառէր զվէմն ահագին,

Զի չարացն արուեստեալ զջուրսն անցուցեալ.

Եւ զպաշտաւնեայն փրկեալ տաճարաւն

Հրաշիւք մեծապէս մեծն Միքայէլ,

Մեծին երեւեալ Կոստանդեայ, ասէր.

_ Պահապան եմք քրիստոնէից,

Եւ քեզ յաղթանակ ընդդէմ թշնամեաց.

Ընկա'լ, մարդասէր, բարերար կամաւք զնուէր մաղթանաց երկրածին մարդկան`

Յաւր յիշատակի երկնային անմարմին զուարթնոցն, աղաչեմք:

Անճառ Աստուած ողորմած, մարդասէր.

Բնաւից բնութեանց ստեղծող յանէից,

Հաւր հզաւրի Յիսուսի` Որդւոյ եւ ազգակցի Հագւոյ անեղծի.

Հայցմամբ արտասուաց երկրահուպ դիմաւք, սրտի բաղձանաւք

Մաղթեմք զփրկիչդ աշխարհի,

Ադամածին սեռի մարդկանըս զարմի.

Բարեխաւսութեամբ սրբոյ Կուսին,

Հայցմամբ Յովհաննու եւ վկայիդ Հաւր,

Առաջին վկային մաղթանաւք,

Համաւրէն սրբոցն դասուց`

Առաքելոց, մարգարէից, հայրապետաց, մարտիրոսաց,

Եւ մերոց տաւնակցացն աղերսիւք,

Զտաւնախմբութիւնս մարդկան զյիշատակ հրանիւթիցն

Ի հաճոյս ընկալ բարերար կամացդ.

Գթաւրէն սիրալիր անհաս ողորմած.

Մարդկան պահապան զդոսա առաքեա',

Եւ եւս առաւել

Արեամբ քո փրկեալ հաւտի սուրբ եկեղեցւոյ,

Ընդ երկին անցելոյդ յերկրի յաջորդաց.

Հայրապետաց` լինել սրբութեամբ

Ի նմանն կոյս ի սպաս պաշտաման,

Եպիսկոպոսաց, քահանայից, սարկաւագաց, դպրաց եկեղեցւոյ`

Վերբերողք ի քեզ միութեամբ,

Թագաւորաց` պահպանութեամբ յաղթութիւն նոքաւք,

Եւ իշխանաց` քաջութիւն,

Եւ զաւրաց` ուժգնութիւն ընդդէմ խաչին թշնամեաց,

Արանց եւ կանանց, ծերոց եւ տղայոց`

Առաջնորդ լինել ի սէր վերին կոչմանն

Եւ ի յոյս ինքեանց միութիւնս,

Ննջեցելոցն` ի յարութեան բարեկամք եւ բարեխաւսք

Առ քեզ, մարդասէր.

Ահա յիշեսցես զհոգիս ննջեցելոցն

Եւ ողորմեսցիս բարեխաւսութեամբ սոցա, աղաչեմք:

Րամեալ միացո' զմեզ ի սէր քո

Եւ զխաղաղութիւն քո տո'ւր մեզ, խնդրեմք:

Ուրախացո' զանձինս, եւ զմիմեանց

Տեառն Աստուծոյ յանձն արասցուք:

ՓՈԽ

Զիննեակ դասուց հրանիւթից

Անմահ երկնային քահանայապետութեանցդ

Այսաւր տաւնախմբեմք զյիշատակ

Մարդիկս երկրածինք` փոքունս ձեր եղբարք.

Անեղին բարձրելոյ աթոռք անարուեստք,

Քերովբէք բազմաչեայք եւ սերովբէք եռահիւսակ,

Հնչողք սրբասացութեանց,

Տիրաբար պետութիւնք, զաւրութիւնք, իշխանութիւնք, զինուորք արարչին,

Միջինք երկնայնոցն եւ երկրորդք առաջնոցն,

Պետութիւնք հրեշտակապետք եւ հրեշտակք անմարմնոցն,

Ծայրք եւ վերջք մարկան պահապանք,

Ճշմարիտ մեր բարեկամք` Միքայէլ եւ Գաբրիէլ,

Զաւրութեանցն Աստուծոյ զաւրեղ զինուորք եւ իշխանք հրեշտակաց,

Գիտութեանցն Աստուծոյ յերկիր հոսիչք

Եւ զմարդիկ առ ձեզ վերբերիչք ի սէր արարչին,

Սաստիչ ստահակաց եւ ուղղոց վարդապետք ի յոյսն անվեհեր,

Զմարդկան աղաւթս ածողք յերկինս առաջի բազմելոյն

Եւ տեսողք զերեսս աղքատացս Աստուծոյ ըստ փրկչին համայնից,

Կենաց պահապանք մեր, միջնորդք մահու եւ փողք յարութեան,

Աւգնականք յաւուրն աներեկ եւ բարեխաւսք առ Յիսուս`

Դատողն անաչառ.

Աղաչեմք հայցմամբ ընդունել զնուէր մաղթանաց

Ի տաւնս ձեր, հզաւրք:

Պահապան մեր լերուք ի յելս եւ ի մուտս, ի կալս եւ ի գնալս,

Ի գիշերի եւ ի տուընջեան, յարթնութեան եւ ի ննջման`

Բանակել շուրջ զմեաւք` զերկիւղածովքս Աստուծոյ,

Յաւր մահու մեր զհոգիս քաղցրութեամբ աւանդողք,

Հեզաբար լերուք երեւեալք, որպէս հարք` առ որդիս.

Ընդ խաւարայինսն զբնաւից

Զերծուցէք զհոգիս ընդ իշխանութիւն ի հոյլս արդարոց.

Զբանսարկուն, բարեկամք մեր, ատեցէք

Եւ զմեզ անվրէպ ի ծոցն ածէք Աստուծոյ,

Որ ողորմութեամբն իւրով եւ բարեխաւսութեամբ ձեր

Փրկեսցէ զմեզ յամենայն վտանգից մերոց`

Շնորհել ողորմութիւն յայժմուս եւ յաներեկ աւուրն:

Եւ այժմ ողորմեա'ց մեզ, Տէր Աստուած մեր,

Ըստ մեծի ողորմութեան քում:

[ՃԶ]

Նոր աւրհնութիւն ընդ հայցուածոց մաղթանաց

Մատուցանեմք առաջի քո,

Հայր անսկիզբն, Որդի անժամանակ, Հոգի մշտնջենաւոր,

Միաստուածութիւն եւ զաւրութիւն,

Որով գոյացան էութիւնք իմանալեաց եւ տարրեղինաց,

Յորոց եւ բնութիւնն խորհրդաստեղծ անկերպիդ կերպարան,

Որոյ խաբմամբ խաւարին յարփիականն մերկացեալ լուսոյ,

Սակայն ոչ անտես եղեալ ի քէն, բարերար.

Ահա ընկալցիս զպաղատանս ժողովելոցս,

Յաղագս առաջիկայ աւծման իւղոյս

Ընդունելոյ առ ի քէն շնորհս, աղաչեմք:

Էիդ լուսոյ անեղի ծագեալ ի ստորինս,

Մի ի յերից ծագումն անուան միածնիդ,

Աւծեր աստուածութեամբդ իբր իւղով զառեալն ի մէնջ մարդկութիւն,

Զնոյն աւծումն ընդ զգայականի խառնեալ աւծութեան,

Աւծեր իւղով ուրախութեան զանդամս մարմնոյ քո զեկեղեցի`

Յաւդեալ ընդ քեզ միութեամբ.

Ի գլխոյդ ահարոնեան ի գրապանս իջեալ զգեստուց,

Իւղ թափեալ անուն,

Լցեր անուշահոտութեամբ զանհամութիւն բնութեանս,

Վասն որոյ եւ աւրիորդք առձայնեալ փեսաւէրացն առաքելոց,

Հաստատեալ զինքեանս իւղովս այս աւրհնութեամբ.

Ահա ընկալցիս զպաղատանս ժողովելոցս,

Յաղագս առաջիկա աւծման իւղոյս

Ընդունելոյ առ ի քէն շնորհս, աղաչեմք:

Րաբուն պանծալի վեհիցն եւ ստորնայնոցս,

Խորագոյն հիման եկեղեցւոյ քո ճարտարապետ,

Որ եւ ի հնումն զորդէգրութեան

Աւետիս աղաւնեաւ Հոգւոյն ի տիպ ձիթենւոյ առ Նոյ ծանուցեր.

Զնոյն Մովսեսիւ ծաղկանց քոյիւք,

Ընդ սոյն խառնութեամբ նշանակեցեր ընդ մերս աւծութեան,

Զչորից առաքինութեանց խառնել միութիւն յորդիս աւծելոց,

Որով աւծան պետք նախկի աւծելոցն հնոյ աւրինին,

Դաս թագազարմից եւ մարգարէից`

Քահանայիւք եւ պաշտաւնէիւք.

Սովաւ եւ ի նորումս զ՚ի ձեռս աւազակաց յանձնեալ,

Նախահաւրն զվէրս հոգւոց բժշկեալ,

Զմարգարէին բարբառ լցեալ,

Աւծեր իւղով զգլուխ եւ բաժակաւդ իմաստութեան զուարճացուցեր.

Ահա ընկալցիս զպաղատանս ժողովելոցս,

Յաղագս առաջիկայ աւծման իւղոյս

Ընդունելոյ առ ի քէն շնորհս, աղաչեմք:

Սովին աւծմամբ իւղոյ զարդարեցեր զեկեղեցի քո, Քրիստոս,

Անհիւթական Հոգւոյն իջմամբ նախ զորս ի վերնատունն,

Զնոյն ընդ հիւթականիս իւղոյ եւ ջրոյ

ԶՀոգւոյդ խառնեալ զաւրութիւն,

Ծնար սովաւ զառ ի քեզ հաւատացեալս յորդիս լուսոյ,

Եւ յորդիս տուընջեան յաւծումն քահանայական եւ թագաւորական.

Դրոշմն տիրական եւ կնիք զգայական,

Ծերութիւն իմաստութեան ի ձէթ հոգւոց պարարտութեան,

Յորմէ աւծան հեթանոսք պարզեալ իւղով ի լերին սրբութեան.

Ահա ընկալցիս զպաղատանս ժողովելոցս.

Յաղագս առաջիկայ աւծման իւղոյս

Ընդունելոյ առ ի քէն շնորհս, աղաչեմք:

Եկեալքս ի տաճար փառաց քոց, աւծեալդ Աստուծոյ

Հովուապետք` հովուաւք եւ պաշտաւնէիւք,

Զձեռս եւ զմիտս վեր ամբառնամք առ մերձդ ամենից.

Ժամանեա' անհեռանալի ի մէնջ յանուն քո ժողովելոց,

Ընկա'լ ի լրումն եկեղեցւոյ քո զընծայեալս ի քոյոց պարգեւաց

Եւ զոգւոյդ միացո աներեւոյթ զաւրութիւն,

Ընդ իւղս այս երեւելի ի զուարթութիւն տրտմեցելոց

Յաւծումն եղջիւր եկեղեցւոյ

Խեթկել զընդդիմամարտին զաւրութիւն եղիցի սա նշան,

Ի ճակատ նախահրաւէր կոչելոցն յարքայութիւնդ երկնից.

Ահա ընկալցիս զպաղատանս ժողովելոցս,

Յաղագս առաջիկայ աւծման իւղոյս

Ընդունելոյ առ ի քէն շնորհս, աղաչեմք:

Սրբեա' զմիտս եւ զխորհուրդս

Եւ զգայական բնութիւնս սովաւ աւծելոց`

Ծնանիլ յորդեգրութիւն Հաւրդ երկնաւորի ի քում ժառանգակցութիւնն,

Նկարել վերստին զպատկերոյ քո գեղեցկութիւն ի դէմս ամենի,

Զգենուլ զքեզ իբր գեղմամբ պարածածկեալ

Ոչխար եւ գառն Աստուծոյ.

Զպատմուճանդ առաջին, ըստ անառակին,

Ոչ մերկանալ դարձեալ, այլ մաքրել արտասուաւք,

Զխայթուածս թունից մահաբերին

Սպեղանեաւս այսու բժշկեսցես.

Ահա ընկալցիս զպաղատանս ժողովելոցս,

Յաղագս առաջիկայ աւծման իւղոյս

Ընդունելոյ առ ի քէն շնորհս, աղաչեմք:

Ի Հաւրէ բղխումն անսպառ,

Որդւոյ փառակից Հոգի Աստուծոյ,

Ի ջուրց վերաստեղծիչ կենդանեաց`

Զգալեաց յառաջնումն եւ իմանալեաց յերկրորդումն,

Առ որ պաղատիմք հայցմամբ մաղթանաց

Ժողովեալքս առաջի քո`

Հեղուլ առատապէս զշնորհաց քոց զանազանութիւն

Ի յիւղս այս սրբութեան,

Ըստ էակցի քո մարդեղութեան ի մեզ նկարեալ

ԶՀոգի իմաբտութեան եւ հանճարոյ,

ԶՀոգի խորհրդոյ եւ զաւրութեան,

ԶՀոգի գիտութեան եւ աստուածպաշտութեան,

ԶՀոգի երկիւղի Աստուծոյ եւ որդէգրութեան,

Լնուլ սովաւ դրոշմեցելոցն եաւթնարփեան շնորհի քո առատութեամբ,

Բարեխաւսութեամբ մաքրեալ հոգւոց քոց բնակութեան,

Արժանացելոց իննեակ դասուց հոգեղինաց

Եւ ընտրելոց ի քէն հողեղինաց.

Ամէնաւրհնեալ կուսի Մարիամու Աստուածածնի`

Մեծին ի ծնունդս կանանց,

Նախահրաւէր այսմ շնորհի Մկրտչին Յովհաննու,

Նախնոյն վկայից եւ սարկաւագաց` սրբոյն Ստեփանոսի,

Առաքելովք եւ մարգարէիւք,

Մարտիրոսաւք եւ ճգնաւորաւք,

Եւ համաւրէն սովաւ աւծելովք արդարոցն

Եւ որ այսր աւծմամբ զմեզ Լուսաւորչի` սրբոյն Գրիգորի.

Ահա յիշեսցի եւ զհոգիս հանգուցելոց մերոց`

Հաւատով ի քեզ ննջեցելոց, խնդրեմք.

Եւ եւս առաւել

Զյորդորումն սիրոյ եւ զգործս բարեաց պարգեւել մեզ, խնդրեմք:

Զանձինս մեր եւ զմիմեանս

Տեառն Աստուծոյ ամենակալի յանձն արասցուք, խնդրեմք:

Րոտեա զմեզ սովին աւծութեամբ

Ի հուր սիրոյ քո, հուրդ Աստուած, խնդրեմք:

Գերագունիդ Էի գթութեան

Զքոյս պարգեւ շնորհի աւծեմք յաղերս փարելի.

Շնորհեա' սովաւ զխաղաղութիւն եկեղեցւոյ

Եւ ընդ սովին տաւաղեալ հաւտի,

Պահեա զնուիրող այսր ընծայի

Զհայրապետս մեր` զտէր [այս անուն]` քեզ ի հաճոյս,

Եպիսկոպոսաւք եւ վարդապետաւք,

Քահանայիւք եւ սարկաւագաւք եւ պաշտաւնէիւք.

Զաւրացո' եւ զաւծեալսն ի թագ արքայութեան

Սորին շնորհիւ պսակեալ,

Զաւրապետաւք եւ զաւրականաւք`

Վանել զներհական զաւրութիւնս ոչ աւծելոցն խաւարազգեստից.

Պարգեւեա' սովաւ եւ տարերաց զբարեխառնութիւն,

Բուսոց եւ տնկոց` զառատապէս պտղաբերութիւն.

Յիշեա' եւ զհոգիս ննջեցելոց մերոց`

Սրբալոյս այս իւղոյ մեռոնիւ աւծելոց,

Եւ ի ծագման քո մեծի իբր զիւղեալ պատրոյկ

Վառեսցես ընդ նոսին եւ զմեզ անշէջ քո լուսով:

Եւ այժմ ողորմեա'ց մեզ, Տէր Աստուած մեր,

Ըստ մեծի ողորմութեան քում:

- ՀԱՎԵԼՎԱԾՆԵՐ ՏԱՂԵՐ ՓՈԽԵՐ

[ՃԷ]

Այսաւր երեւի անտեսն ի բարձանց.

Բանին բընութեամբ բոլոր եղականք

Գովեն գունդք վեհից վերին պետութեանցն:

Դարձեալ կերպանայ ըզմերս ի Կուսէն,

Եղանի հանգոյն հողածնեալ մարդոյն.

Զարգանայր մանուկ հողաստեղծուածոյս,

Էրեւի ծաղիկ նոր շառաւիղին

Ընդ այն յայտնափոխ փոխարկեալ մարդոյն,

Թէ՚նդ այդ յանցանացդ, որ ի պատրողէն :

Ժամանակ եհաս Կուսին աւետեաց,

Ի յորովայնէ նըւաստ երեւեալ

Լընու զամենայն զոր յառաջն ասաց:

Խաղայր խորհըրդով մեծըն Գաբրիէլ

Ծանուցող եղեալ Կուսին աւետեաց.

_Կենաց ես յայտնող, կոյս եւ անարատ,

Հոգի Աստուծոյ ի քեզ եկեսցէ,

Ձայն Տեառն զաւրութեանց ի քեզ որոտայ:

Ղաւղեալ սուրբ Կուսին յահէ հրեշտակին,

Ճեպէր հիացմամբ սափորովն յաղբիւրն,

Միայն հիացեալ ընդ միտս զարմանայր.

_ Յառնէ երկրածնէ ոչ իցեմ խաբեալ,

Նորասքանչ է բանս, զոր ես լըսեցի:

Շտապով տագնապէր, երկիւղիւ լընոյր.

_ Ուստի այս լիցի, _ զայն պատասխանէր, _

Չունիմ ինչ կարծիս, հրեշտակ Աստուծոյ:

Պանծալի ձայնիւ գոչէր Գաբրիէլ.

_ Ջահին մեծ արփւոյն ընդունակ եղեր,

Ռահ ուղղեալ յերկնից բերեմ զաւետիս,

Սպասաւորեմ ես սուրբ թագաւորին,

Վերուստ եմ իջեալ տալով զաւետիս,

Տալով զաւետիս, որ ոչ անցանէ,

Րաբունին Էից ի քէն ծընանի:

Ցընծա', դուստր անմեղ Եւայի ունկամբն,

Ւիւթանիւթ մարմնով, լուծիչ տըրտմութեանց.

Փառաց թագաւորն ի քէն մեզ յայտնեալ,

Քեզ փա~ռք վայելէ յաւիտեանս, ամէն:

[ՃԸ]

Անմահից արքայն եւ սրովբէից անտեսն

Յերկնից ի յերկիր խոնարհեցաւ կամաւ:

Բարձրեալ թագաւորն ըզԳաբրիէլ կոչեաց,

Առ Կոյսն առաքեաց, զխորհուրդըն մեծ յայտնեաց:

Գաբրիէլ եկեալ զողջոյնըն տայր Կուսին.

_ Ուրախ լե'ր, բերկրեալդ, մայր լինելով փըրկչին:

Դրոշմեալ ըզսուրբ Կոյսն Գաբրիելի բարբառն,

Եւ առընկալաւ զԱստուածըն Բանն յինքեան:

Երկինք հիացեալ սասանեցան յահէն,

ԶԲանն Աստուած տեսեալ յարգանդ Կուսին իջեալ:

Զաւրքն անմարմնականք ահիւ մեծաւ պակեան,

ԶՏալիթայն տեսեալ Աստուածածին եղեալ:

Էղեալ անեղին ՚ստ եղականաց մարմին,

Կերպարանըն Հաւր առեալ զկերպ մարդկային:

Ընդ մարմնոյն խառնեալ եւ միացեալ լինի,

Բնութիւն Աստուծոյ ընդ մարդոյն մի Տէր կոչի:

Թագաւորն երկնի յերկրի երեւեսցի,

Բնութեամբ արարիչն որդի մարդոյ լինի:

Ժառանգ աւետեաց Աբրահամուն զարմի,

Այսաւր ի Կուսէն Աստուած եւ մարդ յայտնի:

Ի գիրկըս Կուսին Աստուած տըղայ բազմի,

Արարիչ լուսոյն խանձարրապատ լինի:

Լըւեալ Հերովդէս զհամբաւ ծնընդեան փըրկչին,

Չարութեամբ լըցեալ տայր կոտորել զմանկտին:

Խորհուրդըն ծածկեալ այսաւր ծնընդեամբ յայտնեալ,

Նախամայրն Եւա ի յանիծից փըրկեալ:

Ծնընդեամբ սուրբ Կուսին դրախտն Ադամայ բացաւ,

Եւ ծառըն կենաց պարգեւ բնութեանս տըւաւ:

Կոյսըն Մարիամ Աստուածածին եղեալ,

Ի պարտուց նախնեաց բնութիւնս մեր ազատեալ:

Հաւր մեր Ադամայ վըճար պարտուցն եղեալ,

Եւ ազգ մարդկային յԱդինըն սուրբ դարձեալ:

Ձայնիւ ցընծութեամբ ներպարառեալ խընդամք,

Յաւր նաւակատեաց ծնընդեան փըրկչին խայտամք:

Ղամբար լուսափայլ մեք հաւատով վառեալ,

Յաւր նաւակատեաց ճրագալուցիս բերկրեալ:

Ճըշմարտահաւատ ժողովք ուղղափառաց.

Այսաւր ցընծացէք ի տաւնս ծնընդեան փըրկչին:

Մաքուր սըրբութեամբ պատրաստեցէք ըզձեզ

Տաւնակից լինել անմարմնական դասուցն:

Յերկնից խոնարհեալ անմարմնական զաւրացն`

Տաւնակից լինին որդւոց մարդկան յերկրի:

Նոր երգ պար առեալ հրեշտակական երամքն,

Ձայնիւ սըրբասաց աւրհնեն զծընունդ Կուսին:

Շնորհաւք սուրբ Կուսին եւ կուսածին փըրկչին

Արժանի լիցուք տալ գոհութիւն նըմին:

Ուրախ ցընծութեամբ զնաւակատիս տաւնիս

Այսաւր տաւնեսցուք որդիք Հայոց ազգիս:

[ՃԹ]

Քերովբէից գերագոյն,

Սըրբոյ մաքրենից մաքրագոյն,

Սըրբուհի զըմուռ ծովային,

Ծովայնոյ բերեալ մարգարիտ:

Մարգարիտ լուսոյ արփենւոյն,

Արփենւոյն տարփմամբ սըրտի սէր:

Դու ծաղիկ վարդից բիւրից թերթ,

Թերթ փըթթեալ տերեւ բոցանիշ:

Արեւելեան դուռն աղխեալ փակեալ,

Առաւաւտ յայգւոյն մերկացեալ:

Կարմրերփեան արեւ ծագեցեր`

Ի լերանց ի գլուխ տարածեալ:

Բուրաստան բուրեալ քաղցր աւդիւք,

Փունջ ծաղկանց ծափի հարկանեն:

Անտառից սաղարթ սաւս երփնից

Բարձր ի ծագ ծառոց զարդարին:

Ցաւղ իջմամբ հովիտ շուշանաց

Հիւսիսի մանրիկ արձրեւաց:

Ընդ ծընունդ քո, կոյս Մարիամ,

Աւետեաց հրաւէր յաւրինեմք:

Աւետի~ս, եկեալ Գաբրիէլ

Ի յերկնից քեզ տայր զաւետիս, մե~ծ աւետիս:

[ՃԺ]

Ողջո~յն ընդ քեզ, Մարիամ, աւետի~ս,

Ի քեզ Սուրբ Հոգին եկեսցէ, մե~ծ աւետիս:

Եւ զաւրութիւն բարձրելոյն, աւետի~ս,

Ի վերայ քո հովանասցի, մե~ծ աւետիս:

Ի Սիւքէմ ի նոյն ի յայրին, աւետի~ս,

Ուր ծընաւ արքայն երկնաւոր, մե~ծ աւետիս:

Աստեղեան ծագումն ի յայրին, աւետի~ս,

Հովիւք զարթեան, նոր երգ երգէին, մե~ծ աւետիս:

Յարեւելից եկեալ թագաւորք, աւետի~ս,

Մատուցին զընծայս խորհըրդոյ, մե~ծ աւետիս:

Ի թեման սիւն ամպոյ գործեալ, աւետի~ս,

Թափանցիկ լոյս յարփւոյն երեւեալ, մե~ծ աւետիս:

Զհինաւուրց խորհուրդըն տեսեալ, աւետի~ս,

Նոր մանուկ հրաշալի ծնընդեամբ, մե~ծ աւետիս:

Ընդ երկնային դասուց հրեշտակաց, աւետի~ս,

Երկնաւորք զայս հարցանէին, մե~ծ աւետիս.

_ Ո՞վ է սա, կամ ուստի՞ եկեալ, աւետի~ս,

Նորասքանչ ծնընդեամբ յայտնելով, մե~ծ աւետիս:

Հրեղինաց զաւրաց զըւարթնոցն, աւետի~ս,

Հողեղէն հովուացն յայտնէին, մե~ծ աւետիս:

Սա յերկնից եկեալ թագաւոր, աւետի~ս,

Հաւր սահման անսահմանելւոյն, մե~ծ աւետիս:

Սա յերկրի ի Կուսէ ծընեալ, աւետի~ս,

Աստուած եւ մարդ բնութեամբ միացեալ, մե~ծ աւետիս:

Սըմա փա~ռք ի բարձունս երգեսցուք, աւետի~ս,

Քրիստոսի մեծ թագաւորին, մե~ծ աւետիս:

[ՃԺԱ]

Աւետի~ս, միշտ աւետեաց հընչումն.

_ Տէրըն մեր յարեաւ:

Աւետի~ս, նախանձայնէր հրեշտակն.

_ Տէրըն մեր յարեաւ.

Այսաւր Տէր յարեաւ,

Կանա'յք, զի՞ լայք ըզկենդանին,

Զ՞ի արտասուս հեղոյք:

Շտապ շոյտ ընթացեալ փութով,

Այսր անդր արշաւմամբ.

_ Ո՞ւր է իմ ծընեալ որդեակն,

Այն հրաշածաղիկն:

Մ՞ի դու պարտիզպան բարձեր

Զայն լուսոյ մարմինն,

Ասա', ո՞ւր եդիր ըզնա,

Զի ես երթեալ առից:

Ես երթեալ առից ըզնա,

Տարեալ թաքուցից

Յայն ի հրէական, ը~, մոլախումբ ժողովոյն:

Քեզ քաղցրաձայնեալ ծանաւթ

Յառեալ Մարիամ,

ԶՏէրըդ րաբունեան որդեակդ

Յոյժ կողկողանաւք:

_ Ես եմ նոյն Յիսուս,

Ծընեալն ի քէն կուսութեամբ,

Եկեալ ի կոյս գերեզմանէն.

_ Մի' յիս մերձենար, _ լըսէր,

Չեմ ելեալ առ Հայր,

Չեմ ցուցեալ ըզվէր կողիցս,

Զտեղիս բեւեռաց.

Ընդ իմոյ հետեւողի ի վեր ելէք:

Կենացունաբեր քարոզք,

Ընդ ձեզ եմ յաւիտեան:

[ՃԺԲ]

Թագաւորն անմահ յաշխարհըս երեւեալ,

Ազատեաց զազգըս մարդկան ի բանսարկուէն:

Կերպարանըն Հաւր առեալ ըզմարդկայինս,

Տնաւրինաբար մարմնով խաչի համբերելով:

Զվայրանկեալ բնութիւնս յարութեամբըն նորոգեալ,

Գերագոյն վեհագունիցն յաթոռ նըստոյց:

Թագաւորն փառաց հարեալ ըզպատերազմն.

Աւար առեալ բաշխեաց պարգեւս որդւոց մարդկան:

Հար կործանեաց, ը~, զանմարմինն ըզԲելիար,

Նըշաւակեաց եւ ետ կոխան զաւրաց իւրոց:

Խրախոյս ձայնեաց ընդ տիեզերս որդւոց մարդկան.

_ Քաջըս լերուք, իմ զաւրականք, ես յաղթեցի:

Յահեղ ձայնէն սուրբ զինաւորքըն զաւրացան,

Ճակատ առին եւ ախոյեան չարին յարեան:

Զմըկըրտութիւնն, որ ի Քրիստոս զրահ ըզգեցան,

Վահան ամուր ըզյոյսն ի Տէր ի ձեռս առին:

Ըզսաղաւարտըն փըրկութեան ի գլուխ եդին,

Զբանըն կենաց յանձինս իւրեանց փայլեցուցին:

Այսու զինեալ նոցա ի մարտըն դիմեցին

Եւ յաղթութեան արձան ի մէջ երկրի եդին:

Յորոց եւ մինն այսաւր մարտեաւ արիապէս,

Զոր ժողովեալ պատուեմք սիրով ներտաղապէս

ԶԳէորգէոս, բանին կենաց վաստակաւոր,

Որ ետ պըտուղ ըստացողին հարիւրաւոր:

Խորհըրդական անուանն եղեւ արդիւնաւոր,

Գործեաց զերկիրըս բանաւոր յոյժ հըմտաւոր:

Ի մէջ մըտեալ կռապաշտութեանըն խաւարի,

Լուսապայծառ աստղըս ծագեաց ի յաշխարհի:

Յարքայական հանդէս Հռովմայ մեծ քաղաքի

Ի մէջ կացեալ վըկայ անուանըն Քրիստոսի:

Հիացեալ յոյժ որըք տեսին զզինուորն արի,

Մարտեան ընդ նա պէսպէս երկամբըք վըտանգի:

Նախ ի քերումն ըզսուրբն ածին ի կախանի,

Զմարմինըն զուարթ որպէս ըզվարդ կարմիր ներկեալ:

Եղբաւրորդւոյն եղեւ նըման շքեղազարդեալ,

Պայծառացեալ սպիտակափայլ եւ կարմրացեալ:

Նըման փըրկչին զկողըն տիգին մատուցանէր,

Սուրն ամաչեալ յամբիծ յանձնէն յետս ընկըրկէր:

Դարձեալ ի հուր ողջակիզեալ պատարագէր,

Ամաչեցեալն ի Բաբելոն աստ շիջանէր:

Այլ սուրբ վըկայն ի վաստակոցն ոչ նահանջէր,

Որպէս ըզՏէրըն մեր ի խաչ կախեալ լինէր:

Դասք հրեշտակաց ակումբ զնովաւ շուրջ պարփակէր,

Ձայն ի յերկնից ըզնահատակըն քաջ պընդէր:

Ի յանիւն ապա ածեալ սուրբըն տանջէր,

Հոլանելով սուրբ աղաւնին վիրաւորէր:

Այլ որ զվըկայն ընդ փորձանացըն պըսակէր,

Վաղվաղակի ի չար վիրացըն բըժըշկէր:

Հիացումըն մեծ ըզկռապաշտսըն պաշարէր,

Ի գուբ կըրոյն արկեալ զվըկայն սաստիկ տանջէր:

Ցանկալին ի հրեշտակաց ողջագուրէր,

Անտի ելեալ ի հանդիսի տեղին դիմէր:

Վըկայ խաչին Գէորգէոս բարձըր գոչէր.

_ Ո~վ յիմարեալք խաւարամածք, զլոյսըս տեսէք:

Յաղթեալ նորին բըռնաւորին դէմքն այլայլէր,

Եւ ի զըղջումն այրն ապառում երբէք չմիտէր,

Այլ ի յաւարտ զնահատակին հանդէսն ածէր

Եւ սրով ըզսուրբ գըլուխ գառինըն հատանէր:

Անուշահոտ զենմանըն հոտ յերկինս բուրէր,

Հոտոտելով երկնաւորին կամքըն հաճէր:

Միջնորդ զանուն նահատակին մեզ պարգեւէր,

Զոր կոչելով ի յաւգնութիւն աստ առաքէր:

Բարեխաւս միշտ տաւնողաց ըզսա շնորհէ

Եւ աշխարհի պարգեւատու տընաւրինէ:

Աստուածութեան ի մէնջ առիթ փառատրութեան,

Որ զաւրացոյց զվըկայն, աւրհնեմք միշտ յաւիտեան:

[ՃԺԳ]

Աստուածածին սըրբուհին,

Ամէնաւրհնեալ տիրուհին

Կայր առ խաչին Յիսուսի

Եւ արտասուէր տըրտմալի:

Գոչէր ձայնիւ աղետի.

Զբանսն, որ ասէր սոսկալի,

Շարժէր զամէն կենդանի

Յողբս եւ ի կոծըս բանի.

_ Յիսո'ւս, որդի անձկալի,

Իմ միածին բաղձալի,

Ընդէ՞ր կաս մերկ ի խաչի

Եւ բեւեռեալ ի փայտի:

Սիրտըս խոցեալ կըսկըծի,

Աղիք ծնողիս գալարի,

Զքեզ տեսանեմ ծարաւի

Արբեալ քացախ եւ լեղի:

Եղուկ է մաւրըս կուսի,

Զինչ որ կամիմ չկատարի.

Ո՞վ տայր ինձ ջուր ըմպելի

Արբուցանել զիմ որդի:

Ո'վ հոլոնեալ քահանայք,

Եւ չարագործ պաշտաւնեայք,

Պիղատոսի չար զինուորք,

Դասքըն հրէից սպասաւորք,

Ընդ ո՞ր մեղաց արարիք,

Զայս փոխարէն հատուցէք,

Զկողըն տիգաւ խոցեցիք,

Զբեւեռսն ի ձեռսըն հարիք:

ՅԵգիպտոսէ զձեզ փըրկեաց,

Զծովըն Կարմիր պատառեաց,

Ըզփարաւոնն ընկըղմեաց,

Զձեզ ի նմանէ ազատեաց:

Ձեզ հաց յերկնից պարգեւեաց,

Մանանայիւ կերակրեաց,

Ջուր ի վիմէն ձեզ բըղխեաց

Երկոտասան վըտակաց:

Զի՞նչ գործեցիք, անաւրէնք,

Չար ընդ բարւոյ փոխարէն,

Փարիսեցիք եւ դըպիրք

Եւ քահանայք չար ժըպիրհք:

ՓՈԽ

Ո~վ Սիմէոն ծերունի,

Ահա բան քո կատարի,

Սիրտըս սըրով խոցոտի,

Աղիք ծնողիս գալարի:

Աչացըս լոյս իմ որդի,

Մեծ մըխիթար իմ սըրտի,

Կուսի կաթամբ սընուցի

Եւ մաւր գըթով գըգուեցի.

Թագաւորել յուսայի

Ըստ աւետեացն, որ առի,

Արդ տեսանեմ ի խաչի,

Եւ մաւրս աղիք խարշատի:

Թող արեգակն խաւարի,

Եւ լոյս լուսնին նըւաղի,

Երկիր հիմամբ շարժեսցի,

Վէմք ի վիմաց պատառին:

Ողորմեցէք գերելոյս,

Աշխարեցէք զեղկելիս,

Վա~յ ասացէք ծընողիս,

Խաչեալ իմ Աստուածորդիս:

Պատասխանեալ Յիսուսի

Աստուածամաւրն եւ Կուսի,

Անապական ծընողի,

Մաքուր եւ սուրբ տաճարի.

_ Դու իմ խորան սրբութեան

Եւ առագաստ մաքրութեան,

Դու իմ տաճար բնակութեան

Անճառ Բանիս մարդկութեան.

Դու մի' տըրտմիր, բերկրալի,

Զքեզ ոչ թողից յաշխարհի,

Արդ, Յովհաննէս քեզ որդի,

Իմ աշակերտ սիրելի:

Վասն այնորիկ ես իջի,

Որ մեծ խորհուրդ կատարի,

Մահուամբ խաչիս սոսկալի

Յանցանք նախնոյն քաւեսցի:

Ով որ խաչիս հետեւի,

Պաշտել ըզսա յաւժարի,

Յիմ գալըստեանն երկրորդի

Նա ընդ աջմէ իմ դասի.

Փառաց լիցի արժանի

Եւ արդարոցն երամի,

Փառաւորել զիս ընդ Հաւր

Եւ ընդ Հոգւոյն ճըշմարտի:

[ՃԺԴ]

Խորհուրդ հայրենի աւանդ,

Աւանդ նոյնագոյ արփին,

Արփւոյն նախատես դիտին

Սէր ոսկեփողոյն վառեալ:

Վառեալ հոգեհոս հընչիւն

Խիտ անտառապատ մայրեաց,

Ձայն քաղցրանըւագս առնէր

Տաւիղս որոտման թընդիւն:

Վազս երագընթաց գոյիւք

Լերանց հովանեաւ բարձանց,

Հրափայլ երփնասուր հովտի

Բըլուր կընդըրկի դիմաց:

Տարփող աւետեաց հընչիւն

Բարբառ սրովբէեան դասուց,

Առ քեզ, սուրբ Սիոն դըշխոյ,

Պար թեւասքաւղեալ խըմբից:

Ցընծա' ծաղկազարդ զարմաւք

Ի գոյն շուշանի պըճնեալ,

Հարսնարան վեհին հրաշից

Թագ արքայ եկեալ փեսայ:

Հանգոյն քառակերպ աւդոյն

Կառս յաւանակի նըստեալ,

Սաւառնատարած թեւաւք

Հրաձորձ տարածեալ ցընդմամբ:

Դիմեալ յեդեմեան դիտէն

Ճեմ հարաւային գոլով,

Ժողով յոգնահոյլ խըմբից

Խիտ առ խիտ դիմիւ ելեալ:

Զոստս արմաւենեաց հատեալ,

Տերեւ ձիթենեաց ընծայս

Այն նորոգողին հընոյն,

Այն թագաւորին նըւէրս:

Աստ եբրայեցւոց մանկունքն

Զերգըս սրովբէիցն առեալ,

Հեթանոսական դասուցն

Տաւնակից վեհիցն եղեալ:

ՓՈԽ

Յայս նոր աւետեաց աւուրս

Երկիրս պանծացեալ բերկրի,

Ծով գարնանաշարժ ալեաւք,

Ծով երկնատարած ծըփի:

Դաշտ կարմրավարդից վառեալ

Կանաչ սաղարթից թերթից,

Հընչիւն նըւագի բարբառ.

Ովսաննա~, աւրհնեալ, որ գաս:

Զսա նահապետաց տեսեալ,

Պետ իշխանական եկեալ,

Սա նախագուշակ դաւթեան

Յաւէտազըւարճ լերանց:

Սա Զաքարիաս քարոզ

Թագաւոր ի նոյն եկեալ,

Նոյն աւրհներգութիւն միշտ Հաւր

Նոյն համագոյեան Բանին:

Յաւէտ էութեան Հոգւոյն,

Երրեակ միութեան միոյն

Սմա միշտ երգեսցուք ըզփառս

Այժմ եւ յաւիտեանս, ամէն:

ՃԺԴա. ՏԱՂ ԾԱՂԿԱԶԱՐԴԻՆ, Ի ՆԵՐՍԷՍ ԿԱԹՈՂԻԿՈՍԷ ԿԼԱՅԵՑՈՅ

Ոստս արմաւենեաց հատեալ,

Տերեւ ձիթենեաց առեալ,

Այն նորոգողին բերեալ,

Թագաւորին ընծայեալ:

Աստ եբրայեցւոց մանկունքն

Զերգըս սրովբէիցն առեալ,

Հեթանոսական դասուքն

Տաւնակից վերնոցն եղեալ:

Յայս նոր աւետեաց աւուրս

Երկիրս պանծացեալ բերկրի,

Ծով գարնանաշարժ ալեաւք,

Ծով երկնատարած ծըփի:

Դաշտ կարմիր վարդով վառեալ,

Կանաչ սաղարթիւք թերթեալ

Շընչիւն նըւագի բարբառ.

Ովսաննա~, աւրհնեալ, որ գաս:

Զսա նահապետաց տեսեալ,

Պետ իշխանական եկեալ,

Սա նախագուշակ Դաւթի

Յաւէտազըւարճ լերանց:

Սա Զաքարիայն քարոզ,

Թագաւոր քո հեզ եկեալ:

Նոյն աւրհներգութիւն միշտ Հաւր,

Նոյն եւ համագոյ Հոգւոյն:

[ՃԺԵ]

Հանճարեղ շնորհալիդ ընտրեալ է,

Յարքայից հըզօրաց զարմէ է,

Մեզ պարգեւ ի տանէն Լատինէ.

Հրեշտակ հրաշագեղ Հռիփսիմէ:

Ռահահորդ ուղեւոր երկնընթաց,

Օրինաց երկնայնոցն խորազգաց.

Ուրացեալ զանձն եւ զփառս հայրենեաց.

Հրեշտակ հրաշագեղ Հռիփսիմէ:

Իմաստուն սուրբ կուսան գերյարգոյ,

Հրով Բանին ի յերկիր արկելոյ

Վառեցեր ըզլապտեր հաւատոյ.

Հրեշտակ հրաշագեղ Հռիփսիմէ:

Փեսային Քրիստոսի մարմնացեալ,

Անապակ կուսութեամբ հարսնացեալ,

Յառագաստ անմատոյց բազմեցեալ.

Հրեշտակ հրաշագեղ Հռիփսիմէ:

Սիրասնունդ սիրամարգ սըխրալի,

Նըրբափայլ ոսկէթել տարփալի

Եռապսակ իւղագլուխ ցանկալի.

Հրեշտակ հրաշագեղ Հռիփսիմէ:

Իսկաճեմ աղաւնի օդապար,

Նոր Նոյեան տապանն է քոյդ դադար,

Օձասպան արագիլ դու արդար.

Հրեշտակ հրաշագեղ Հռիփսիմէ:

Մըտաւոր մարտիրոս մըրցական,

Էական Բանին Հօր զօրութեան,

Լիակոխ քաջութեամբ ըզհընձան.

Հրեշտակ հրաշագեղ Հռիփսիմէ:

Է գունեղ թաթաւեալ ի բոսոր,

Սաղարթուն կարմրորակ իբր խընձոր,

Հարսն ազնիւ դու արեամբ քօղաւոր.

Հրեշտակ հրաշագեղ Հռիփսիմէ:

ՎԵՐՋ